لواء الاسلام احمد هلال

...يا حكومة ميه ميه...

معيشانا عيشة هنية.

كنت بحلم بعربية.

خايف من يوم تبقي حافية فيه رجليا

.
حتى رغيف العيش مش قادر اشوفه بعنيا.

بيقولوا قمح مسرطن يمكن بيكدبوا عليا!!.

يا حكومه ميه ميه.

رجالتك متهنيين بالسفر في كل بلد شوية.

ورجال أعمال مشهورين في الملاهي الليلية.

وكمان فلوس كتير وعربيات مش عربية.

...يا حكومة ميه ميه...

معلق اّمالي على وعودك ما تغدريش بيا.

قولتي هندي كادر وحرمتي منه شويه.

مش قادرة تاخدي موقف من جلادين السعودية.

ولا حتى تمنعي الغاز من دولة صهيونية.

أو حتى تحاكمي واحد قتل ألف وميه.

ناس طول عمرها شقيانة وراحوا في شربة ميه.

القاتل هرب وما دفعش حتى الدية.

وكمان الباشوات حكمولوا ببراءة القضية.

طلاب بيموتوا في المدارس وتقولي محو امية.

...يا حكومة ميه ميه...

عاملين لجان في الشوارع وللناس كروت ارهابية.

مش كفاية بتشوفوا البطاقة وكمان تفتيشات ذاتية.

رحت أطلع رخصة قالوا مدرسة مرورية.

قلت بعرف اسوق قالوا يا واسطة يا تدفع خمسمية.

يا ناس دي رخصة خاصة مش رخصة دولية.

...يا حكومة ميه ميه...

بتد خلوا البيوت بطرق وحشية.

تكسروا وتسرقوا حتى الكتب الدينية.

وكمان في الجامعة مشغلين بلطجية.

وتستبعدوا الطلبة من المدن الجامعية.

اعتقالات للشرفا في عنابر غير أدمية.

شتيمة وقلة أدب وأساليب تعذيبية.

وما بتقولوش كفاية كمان زنازين انفرادية.

أسألوا محمد خيري في المعتقل كل شوية.

مقضي معظم وقته في الكوبانية.

علشان من الاخوان وسماته اسلامية.

...يا حكومة ميه ميه...

أقول حريق الشورى ولا السكك الحديدية.

ولا السكري وطلعت اللي قتلوا اللبنانية.

يصرف كام مليون عشان واحدة مغنية.

وناس مش لاقية تلبس ولو معونة شتوية.

ولا فضايح الضباط في كل قسم شوية.

واسالوا ضحايا الفيوم وحمادة بتاع اسكندرية.

فضل الضابط يعذبه لما شل اطرافه الرباعية.

نفسي اشوف كل ضابط اخلاقه اسلاميه.

ويراعي ضميره والذات الا لهية.

...يا حكومة ميه ميه...

عايزه تبيعي النيل وتحرمينا من الميه.

بعد كده أخاف استحمى ما نتزّلش الحنفية.

أحمد هلال